Komentimi i ajeteve 71-72 të sures Teube

Titulli: Komentimi i ajeteve 71-72 të sures Teube 12.07.08 14:20

“Besimtarët dhe besimtaret janë të dashur për njëri-tjetrin, urdhërojnë për të mirë e ndalojnë nga e keqa, e falin namazin dhe japin zekatin, respektojnë Allahun dhe të Dërguarin e Tij. Të tillët do t'i mëshirojë Allahu. Allahu është ngadhënjyes, i urtë.
Besimtarëve dhe besimtareve Allahu u premtoi xhenete nën të cilët rrjedhin lumenj, në to do të jenë përgjithmonë dhe (u premtoi) vendbanime të bukura në xhenetin e Adnit, edhe një disponim nga Allahu, që është mbi të gjitha. Ky, pra është ai shpëtimi i madh.” (Teube, 71-72)
Pasi Allahu i Lartësuar tregoi për munafikët në ajetet para këtyre, për cilësitë dhe natyrshmërinë e tyre, gjithashtu njoftoi se ajo që bëjnë munafikët nuk është diçka e re për besimtarët e Allahut, një gjë të tillë e bënin edhe popujt që ishin para tyre, të cilët i kundërshtuan të Dërguarit e Allahut, në ajetet vijuese Allahu i Lartësuar fillon të përmendë cilësitë e besimtarëve të sinqertë, kujdesin dhe dashurinë e tyre ndaj njëri-tjetrit. Allahu thotë: “Besimtarët dhe besimtaret janë të dashur për njëri-tjetrin, urdhërojnë për të mirë, e ndalojnë nga e keqa, e falin namazin dhe japin zekatin, respektojnë Allahun dhe të Dërguarin e Tij. Të tillët do t'i mëshirojë Allahu. Allahu është ngadhënjyes, i urtë.”
Besimtarët janë ata të cilët duhen në mes tyre vetëm për hir të Allahut, janë miq të njëri-tjetrit, zemrat e tyre janë si një trup i përbashkët. Allahu në këtë ajet thotë: “Besimtarët dhe besimtaret janë të dashur për njëri-tjetrin”, ndërsa në ajetet e mëparshme thotë: “Hipokritët dhe hipokritet janë si njëri-tjetri”, për arsye se zemrat e besimtarëve janë të lidhura mes tyre, ndërsa zemrat e munafikëve janë të përçara, kundërshtohen njëra me tjetrën.
Besimtarët janë ata të cilët urdhërojnë për punë të mira, ndalojnë nga e keqja, urdhërojnë për adhurimin e Allahut dhe ndalojnë adhurimin e idhujve dhe të putave të ndryshëm.
Imam Taberiu ka thënë se çdoherë që ceket urdhërimi për të mirë në Kuran, është për qëllim ftesa nga shirku në Islam, nga mosbesimi në iman, ndërsa çdoherë që është cekur ndalimi nga e keqja, është për qëllim ndalimi nga adhurimi i idhujve dhe i djajve.
Besimtarët dhe besimtaret falin namazin, i cili është një ndër lidhshmëritë më të forta mes Krijuesit dhe krijesës, japin zekatin, i cili është një lidhje e fortë që mban shoqërinë muslimane, respektojnë Allahun dhe të Dërguarin e Tij. D.m.th, epshi i tyre nuk pason tjetër përveçse urdhrat e Allahut dhe të të Dërguarit të Tij. Besimtarët e tillë, të cilët i kanë këto cilësi, nuk kanë ligje të tjera që u dorëzohen përveç ligjeve të Allahut, ata nuk kërkojnë zgjedhje tjetër, nëse Allahu dhe i Dërguari i Tij kanë caktuar për një çështje. Me këto gjëra ata janë të bashkuar në metodologjinë dhe rrugën e tyre, njësojnë qëllimet e tyre. Të tillët Allahu do t’i mëshirojë. Thotë Allahu: “Të tillët do t'i mëshirojë Allahu.”
Mëshira që përmendet në këtë ajet nuk është vetëm mëshira në botën tjetër, por ajo së pari do të jetë në këtë botë, e cila përfshin tërë shoqërinë që i ka këto cilësi. Allahu ka zbritur mëshirë mbi ta dhe i ka qetësuar zemrat e tyre. Ai ka zbritur mëshirë mbi ta në lidhshmërinë me Allahun dhe zemrat e tyre me mëshirën e Allahut janë të mbrojtura nga përçarjet dhe mospajtimet. Besimtarët e besimtaret janë të kënaqur me Allahun. Allahu për të gjitha këto është i Plotfuqishëm.
Pasi në ajetet e mëhershme Allahu u premton munafikëve zjarr të përhershëm, besimtarëve u ka përgatitur xhenet të përhershëm nën të cilat rrjedhin lumenj, vendbanime të mira në xhenetin Adn: “Besimtarëve dhe besimtareve Allahu u premtoi xhenete nën të cilët rrjedhin lumenj, në të to do të jenë përgjithmonë, dhe (u premtoi) vendbanime të bukura në xhenetin e Adnit”, por kënaqësia e Allahut është mbi të gjitha këto. Allahu thotë: “Edhe një disponim nga Allahu, që është mbi të gjitha.”
Kjo është fitorja më e madhe: “Ky, pra është ai shpëtimi i madh.”
E lusim Allahun që të na bëjë prej atyre që duhen, urdhërojnë për të mirë dhe ndalojnë nga e keqja, respektojnë Allahun dhe të Dërguarin e Tij!
E lusim Allahun që të na mëshirojë me mëshirën e Tij dhe të jetë i kënaqur me ne!

Shaban Murati
14.9.2007
KLUBIKULTUROR.COM

» KOMENTIMI I ISTIHADES "EUDHU BIL-LAHI MINESH SHEJTANIR-RAXHIM"